Video

Transkriptlər

Hər şeyin lazım olduğu kimi olmadığı hissi hər kəsə tanışdır.

Kifayət qədər uğurlu olmamağınız, münasibətinizin sizə kifayət qədər qane etməməyi, arzuladığınız şeylərə sahib olmamağınız.

Sizi xaricə həsədlə, daxilə isə xəyal qırıqlığı ilə baxmağa vadar edən xroniki narazılıq.

Pop kultura, reklam və sosial media, xəyal etdiyiniz işdən daha az bir şeyə nail olmağın uğursuzluq olduğunu sizə xatırladaraq bunu daha da pisləşdirir,

daim möhtəşəm təcrübələrə sahib olmalı, şərti olaraq cəlbedici olmalı, çoxlu dostlara sahib olmalı və öz ikinci yarılarını tapmalısan və başqaları bütün bunlara sahibdirlər və həqiqətən xoşbəxtdirlər.

Və əlbəttə ki, geniş çeşidli özünü inkişaf məhsulları öz üzərinizdə kifayət qədər işləmədiyiniz üçün bütün günahın sizdə olduğunu deyir.

Son iki onillikdə tədqiqatçılar bu impulslara necə qarşı çıxa biləcəyimizi araşdırmağa başlayıblar.

Müsbət psixologiya sahəsi ortaya çıxdı, həyatı yaşamağa dəyər edən şeylərin öyrənilməsi, mənfi hissləri dəyişdirmək üçün koqnitiv davranış terapiyası inkişaf etdirildi.

Elm adamları “niyə bəzi insanlar digərlərindən daha xoşbəxt və daha razıdırlar?” sualını verməyə başladılar.

“Və onların etdiklərini digərlərinə də tətbiq etməyin yolları varmı?”

Bu videoda insanların nə qədər xoşbəxt olduqlarını, necə asanlıqla dostluq qurduqlarını və çətinliklərin öhdəsindən necə gəldiklərini göstərən ən güclü göstəricilərindən biri haqqında danışmaq istəyirik.

Narazılığın, belə desək, çarəsi:

Minnətdarlıq.

Minnətdarlıq heşteqlərdən istifadə edən insanlar tərəfindən təbliğ edilən başqa bir özünü inkişaf tendensiyası kimi səslənsə də, hazırda bu barədə bildiklərimiz bir çox elmi iş və araşdırmalara əsaslanır.

Onları videonun açıqlama hissəsinə əlavə edəcəyik.

Minnətdarlıq müxtəlif kontekstlərdə fərqli insanlar üçün çox fərqli şeylər ifadə edə bilər.

Bu, bir xarakter xüsusiyyəti, bir hiss, bir fəzilət və bir davranışdır.

Sizin üçün nəsə edən birinə, hava kimi təsadüfi hadisələrə, hətta təbiətə və ya taleyə görə minnətdar ola bilərsiniz və bu, biologiyamızın bir hissəsidir.

1: Minnətdarlıq necə bizi bir-birimizə bağlayır.

Minnətdarlığın sələfi yəqin ki, qarşılıqlılıqdır.

Çox güman ki, o, qarşılıqlı fayda üçün heyvanları bir-biriləri ilə nələrisə mübadilə etməyə sövq edən bir bioloji siqnal kimi inkişaf edib və heyvanlar aləmində müəyyən balıqlar, quşlar və ya məməlilər arasında, xüsusən də primatlarda tapıla bilər.

Beyniniz kiminsə sizin üçün yaxşı bir şey etdiyini başa düşdükdə minnətdarlıqla reaksiya verir ki, sizi onlara olan borcunuzu ödəməyə həvəsləndirsin.

Bu minnətdarlıq sizin başqalarının, başqalarının isə sizin qeydinizə qalmağa vadar edir.

Bu vacib idi, çünki insan beyni emosiyaları oxumaqda yaxşılaşdıqca, eqoist insanlar müəyyən edilir və kənarlaşdırılırdı.

Bu, başqaları ilə yaxşı yola getmək və davamlı əlaqələr qurmaq üçün bir təkamül üstünlüyünə çevrildi.

Məsələn, siz ac idinizsə və kimsə sizə ləzzətli giləmeyvəni harada tapacağınızı göstərdisə, onlara qarşı minnətdarlıq və gələcəkdə bu lütfü qaytarmaq üçün bir əlaqə, sosial yönümlü olmaq istəyi hiss etdiniz.

Siz onlara əvəzini qaytaranda isə onlar da sizə qarşı minnətdarlıq hiss etdilər.

Bu, əcdadlarınızı bir-birinə yaxınlaşdırdı və bir-birləri ilə əlaqələr, dostluqlar yaratdı.

Beləliklə, minnətdarlığın ilk formaları əməkdaşlıq istiqamətində davranışınızı dəyişdirən bioloji mexanizmlər idi ki, bu da insanların Yer üzərində hökmranlıq etməsinə kömək etdi.

Ancaq zaman keçdikcə minnətdarlıq ədalətli olmaq istəyindən daha artığına çevrildi.

2: Minnətdarlığın nəticələri

Alimlər müəyyən ediblər ki, minnətdarlıq beyninizdə mükafatlandırma duyğularını, sosial əlaqələr yaratmaq və başqalarının niyyətlərini şərh etməkdə iştirak edən yolları stimullaşdırır.

O, həmçinin müsbət xatirələri yadda saxlamağı və onları xatırlamağı asanlaşdırır.

Bundan əlavə, minnətdarlıq paxıllıq və sosial müqayisə, narsisizm, sinizm və materializm kimi mənfi hisslərə və xüsusiyyətlərə birbaşa təsir göstərir.

Nəticə etibarı ilə, nəyə görə olursa olsun, minnətdar olan insanlar daha xoşbəxt və daha məmnun olurlar.

Onların daha yaxşı münasibətləri var, dost qazanmaq onlar üçün daha asandır.

Onlar daha yaxşı yatırlar, depressiyadan, asılılıqdan və tükənmişlikdən daha az əziyyət çəkirlər və travmatik hadisələrin öhdəsindən daha yaxşı gəlirlər.

Minnətdarlıq bir növ müasir həyatın sizin üçün qurduğu psixoloji tələlərdən birinə düşmə ehtimalınızı azaldır.

Məsələn, minnətdarlıq müsbət hadisələri unutmaq və onların əhəmiyyətini azaltmaq meylinin qarşısını alır.

Əgər bir şey üçün uzun müddət və çox çalışırsınızsa, sonda onu əldə etmək sizə özünüzü mənasız və boş hiss etdirə bilər.

Özünüzü emosional olaraq başladığınız yerdə tapa bilərsiniz və özünüzdən məmnun olmaq əvəzinə, həmin məmnuniyyəti axtararaq növbəti ən böyük şeyə nail olmağa çalışa bilərsiniz.

Və ya təsəvvür edin ki, tənhasınız və daha çox dostunuzun olmağını istəyirsiniz.

Əslində sizinlə vaxt keçirmək istəyən biri və ya bir neçə nəfər ola bilər, lakin siz bunun kifayət etmədiyini, həmişə uduzan insan olduğunuzu düşünə və özünüzü pis hiss edə bilərsiniz.

Beləliklə, onların birlikdə vaxt keçirmək cəhdlərini geri çevirə və daha da tənha ola bilərsiniz.

Bunun əvəzinə, münasibətlərinizə görə minnətdarlıq hiss edirsinizsə, dəvətləri qəbul edə və ya hətta özünüz də təşəbbüs göstərə bilərsiniz.

İnsanlara nə qədər çox açılsanız, əlaqələri möhkəmləndirmək və yeni insanlarla tanış olmaq şansı da bir o qədər yüksək olar.

Ən yaxşı halda minnətdarlıq geri dönüş tsiklinə səbəb ola bilər.

Müsbət hisslər daha çox pro-sosial davranışa səbəb olur ki, bu da daha müsbət hisslərə səbəb olan daha müsbət sosial təcrübələrə aparır.

Bu ciddi çətinliklərdən sonra gələn yayğın bir təcrübədir, məsələn, kimyaterapiya kimi.

Həyat hansısa bir böhran bitdikdən sonra heyrətamiz hiss etdirə bilər.

Ən xırda şeylər, dad ala bilməkdən tutmuş günəş altında oturmağa və ya bir dostla söhbət etməyə qədər sonsuz sevinc mənbəyi ola bilər.

Bəlkə də həyatınız əvvəlki ilə eyni və ya bir qədər pisdir, lakin beyniniz indiki təcrübələrinizi həyatın pis olduğu dövrlərlə müqayisə edir və minnətdarlıqla reaksiya verir.

Bir sözlə, minnətdarlıq diqqətinizi sahib olduğunuz yaxşı şeylərə yönəldir və bu dəyişikliyin nəticələri daha yaxşı hisslər və daha müsbət təcrübələrdir.

Bunları bilmək gözəl olsa da, minnətdarlığı daha çox hiss etməyiniz üçün hər hansı bir yol varmı?

3: Beyninizi necə daha minnətdar etmək olar

Minnətdarlıq hissini az və ya çox yaşamaq bacarığı bərabər paylanmayıb.

Sizdə minnətdarlıq xüsusiyyəti mövcuddur və o sizin bunu nə qədər hiss edə bildiyinizi müəyyən edir.

Bu, sizin genetikanızdan, şəxsiyyətinizdən və mədəniyyətinizdən asılıdır.

Bu kəşf elm adamlarını maraqlandırdı ki, görəsən onlar minnətdarlıq xüsusiyyətinizi dəyişdirən və daha çox xoşbəxtliyə səbəb olan məşqlər hazırlaya bilərlərmi.

Gəlin vacib xəbərdarlıqlarla başlayaq.

Minnətdarlığın nə dərəcədə öyrədilə biləcəyi və ya təsirlərin nə qədər davam edəcəyi hələ tam aydın deyil.

Xoşbəxtlik üçün sehirli dərmanlar mövcud deyil.

Həyat qəlizdir.

Bəzi günlər özünüzü kontrolda hiss edirsiniz, digər günlər isə yox.

Və bu normaldır.

Həmçinin bəzən xoşbəxtliyin arxasınca getmək, özünüzə çox yüklənsəniz, sizi daha da bədbəxt edə bilər.

Minnətdarlıq həm də depressiyanın çarəsi və ya professional yardım almağa əvəz kimi görülməməlidir.

O, pazlın yalnız bir parçası ola bilər.

Bütün pazlın həlli ola bilməz.

Ən asan minnətdarlıq məşqi arxasında möhkəm araşdırmalar dayanan minnətdarlıq gündəliyidir.

Bu, həftədə 1-3 dəfə bir neçə dəqiqə oturmaq və minnətdar olduğunuz 5-10 şeyi yazmaq deməkdir.

Başlanğıcda bu çox qəribə görünə bilər, ona görə, sadədən başlayın.

Kiçik bir şeyə görə minnətdar hiss edə bilərsinizmi?

Qəhvənin nə qədər möhtəşəm olduğu və ya birinin sizə xeyirxah davranması kimi.

Başqasının sizin üçün etdiyi bir şeyi qiymətləndirə bilərsinizmi?

Nələrsə və ya kimlərsə mövcud olmasalar, onlar üçün darıxacağınız və onların həyatınızda olduğu üçün minnətdar olduğunuz haqqında düşünə bilərsinizmi?

Biz hamımız fərqliyik, ona görə də sizin üçün nəyin işə yaradığını bilirsiniz.

Və düzü, bu qədər.

Bu, demək olar, təhqiredici görünür, sanki hər şey o qədər də sadə olmamalıdır.

Lakin çoxsaylı tədqiqatlarda iştirakçılar bu məşqdən bir neçə həftə sonra daha çox xoşbəxtlik və daha yüksək ümumi həyat məmnuniyyəti əldə etdiklərini bildirdilər.

Bundan əlavə, tədqiqatlar başa çatdıqdan bir neçə ay sonra beyin fəaliyyətində dəyişikliklər tapıldı.

Minnətdarlığı məşq etmək özünüzü yenidən proqramlaşdırmağın həqiqi yolu ola bilər.

Bu araşdırma göstərir ki, hissləriniz sabit deyil.

Nəticədə həyatı necə yaşadığınız onun haqqında nəyə inandığınızın ifadəsidir.

Özünüz və həyatınız haqqındakı əsas inanclarınızın üzərinə getsəniz, öz düşüncələrinizi və hisslərinizi dəyişdirə bilərsiniz, bu da avtomatik olaraq davranışlarınızı dəyişdirəcək.

Özünü refleksiya kimi sadə bir şeyin narazılıqla mübarizə aparmaq üçün beynimizdəki yolları sındıra bilməsi olduqca təəccüblüdür.

Və əgər bu, optimist olmaq üçün bir səbəb deyilsə, bəs nədir?

İnsan olmaq çətindir, ancaq o qədər də çətin olmağına ehtiyac yoxdur.

Və diqqətlə baxsanız, həyatınızın düşündüyünüzdən daha yaxşı olduğunu görə bilərsiniz.

Əgər bununla maraqlanırsınızsa və minnətdarlığınızı sınamaq istəyirsinizsə, biz bir şey düzəltmişik.

Nəzərə alın ki, minnətdarlığınızı məşq etdirmək üçün heç kimdən nəsə almalı deyilsiniz.

Sizə lazım olan tək şey kağız, qələm və beş dəqiqədir.

Bunu demişkən, biz oxuduğumuz araşdırmalara, ekspertlərlə söhbətlərə və son bir ildə minnətdarlıqla bağlı şəxsi təcrübələrimizə əsaslanaraq Kurzgesagt minnətdarlıq gündəliyi hazırlamışıq.

Bu, minnətdarlıq gündəliyi tutmaq vərdişinə öyrəşməyi bir qədər asanlaşdıra biləcək şəkildə qurulmuşdur.

Bunun daha maraqlı olması üçün orada çoxlu qısa izahlar və fikirlər var.

Biz həm də onu bacardığımız qədər gözəl etmişik.

Bu video nikbin nihilizmdən təkliyə və indi də minnətdarlığa kimi daha şəxsi, introspektiv videoların qeyri-rəsmi seriyasını davam etdirir.

Biz özünə-kömək kanalı olmaq istəmirik, ona görə də bu cür videoları ildə təxminən bir dəfə paylaşacağıq.

Ümid edirik ki, onlar bəziləriniz üçün faydalıdır.

İzlədiyiniz üçün təşəkkürlər.