影片

文字稿

人類嘅存在係樣幾得人驚 又叫人搞唔明嘅嘢

係幾十萬年前 我哋意識到自身嘅存在 然後發現自己身處一個奇怪嘅地方

呢度充斥住除咗我哋以外嘅其他生物 有啲係我哋食得嘅 有啲會想食咗我哋

呢度有啲液體可以俾我哋飲 仲有啲材料可以攞嚟創造其他嘢

日頭嘅天空有舊細細粒嘅黃色球體嚟暖住我哋

而夜晚嘅天空則有好靚好靚嘅星光點綴住

呢個地方肯定係為咗我哋獨身訂造㗎啦

肯定有個唔知邊個係唔知邊度偷偷照應緊我哋

呢度就係我哋嘅歸屬 咁樣諗下就覺得所有嘢好似都冇咁得人驚又冇咁蒙查查

但係隨住我哋日漸成熟 我哋對於呢個世界同埋自身嘅認知亦都變得多咗

我哋發現啲閃下閃下嘅星光唔係為咗我哋先咁靚 佢就係鍾意係咁閃啫

我哋明白到我哋唔係呢個 我哋宜家稱之為宇宙嘅地方嘅中心

而且佢仲老過我哋以為嘅好鬼好鬼多添

我哋發現我哋係由好多好多嘅非生物組成

然而組成一大舊之後唔知點解佢又有咗生命

仲明白咗 我哋只不過係有幾億年存在經歷嘅歷史長河之中 又一段簡短嘅存在

我哋好shock咁得知 我哋係住緊係一舊圍住一個中型恆星轉緊嘅潮濕塵粒度

呢個灰點存在係一個普遍嘅銀河系嘅一臂度 我哋永遠都被困住係呢個銀河系所處於嘅呢個星系團入面

而呢個星系團又只不過係組成「超星系團」嘅幾千個星系團中嘅一個

至於呢個超星系團亦都不過為組成我哋稱之為「可觀測宇宙」嘅存在嘅幾千個超星系團中嘅其中之一 （係咪好複雜呢我都覺呀）

宇宙呢家嘢可能大過我哋想像中嘅百萬倍 然而我哋永遠都唔可能知道佢究竟有幾大

我哋可以好扮嘢咁係度話呢個宇宙有成二百萬個銀河系呀

幾百萬兆粒星星呀 又或者阿媽都唔知有幾多粒嘅星體

但係所有呢啲數字都不過係廢嗡 我哋嘅大腦根本冇辦法去理解呢啲概念

個宇宙實在太過太過大喇 有太多太多嘢我哋搞唔明

但其實呢個都唔係最為令到我哋困擾嘅概念

「時間」呢家嘢仲麻煩過「宇宙嘅size」 嚴格嚟講係「我哋所擁有嘅時間」呢家嘢

假如你夠好彩到100歲先兩腳一伸去見閻王爺

你嘅人生一共有5200個禮拜任憑你處置

如果話你宜家已經25歲嘅話 你仲有3900個禮拜剩

繼續假設話你會係70歲瓜柴 咁你仲有2340個禮拜剩

聽落就話仲有大把時間啫 但係諗諗下好似都唔係咋喎

咁跟住點呀？

你嘅生物機能會開始分解

而你嘅動態模式 即係你啦 就會轉變為靜態 講白咗就係你想郁都郁唔到啦

然之後你就會分解到渣都冇得剩 你就咁冇鬼咗啦

有啲人相信每個人都有一部分係不可視不可見嘅會繼續留存於世

只不過咁我哋又點去驗證呢個睇法呢 冇法子呀嘛 所以人生可能就真係就咁玩完

而我哋就真係就咁死鬼咗 game over

聽落去又真係會幾騰雞下 事實上又未至於嘅

假如你對你開始存在之前嘅13.75億年都毫無印象嘅話

咁之後個幾十幾百幾千幾萬幾億幾兆年嘅流逝對你都唔會話有咩影響啦 好快就過去嘅啫眨下眼就冇㗎啦

所以闔埋你對眼啦 跟住數到1

所謂「永遠」都不過係咁長㗎咋

講真就我哋所知 到最後宇宙自身都會瓜老襯 而所有嘢都會就咁維持住死嘅狀態

我哋啲片搞到唔少人開始對存在呢件事感到幾不安下

而頭先過咗去嗰幾分鐘大概都冇咩安慰作用

所以呢我哋諗緊 不如偶爾都換個角度嚟睇呢啲嘢囉

由一個同科學無關 非常主觀嘅角度嚟睇 你可以話成個觀點就係我哋Kurzgesagt嘅哲學觀

嗱嗱嗱利申下先 我哋對於人類嘅存在價值呢家嘢唔比你有更加多嘅認識㗎

針對因為存在而感到嘅不安 我哋係通過「樂觀性虛無主義」嚟應對嘅

你話咁即係點？

Well 總結下啦 假如話200平方兆粒星星都係為咗我哋而存在嘅守護天使又真係唔係好現實

係某種程度上我哋嘅存在自身就好似咩殘忍嘅玩笑

我哋對於自身嘅存在有咗認知 然而同時認知到係《存在》呢成個故仔入面 我哋只不過係個配角都算唔上嘅龍套

當然啦 可以學到關於電子呀細胞線粒體都係幾好玩嘅嘢

科學其實都冇話有咩辦法去安慰下渺小嘅我哋受傷嘅小心靈

好囉 只不過就算係咁又點啫

一世人都係得一條命㗎咋 雖然話會好驚 但係同時你亦都自由咗

假如宇宙係熱寂之中消亡 所有你做過嘅尷尬嘢都會被人遺忘

所有你犯過嘅錯誤亦都唔會有任何意義

所有你做過嘅衰嘢都會就咁消失

如果我哋嘅人生就係我哋得以經歷嘅一切 難道佢唔就係唯一有意義嘅一切咩

如果呢個宇宙根本冇咩規則 咁唯一有意義嘅規則就係我哋自己認定嘅原則

如果呢個宇宙根本冇咩目的 咁我哋就可以自己判定佢嘅目的係乜嘢

幾乎可以肯定咁話人類遲早會滅絕

但係係我哋消失殆盡之前 我哋得以去探索去體會呢個世上嘅一切

我哋有得去感受唔同嘅情緒 我哋有得去經歷食物、書、日出 同埋係彼此身邊嘅體驗

單單係我哋有呢個能力去諗咁多嘢就已經幾犀利下

人好容易就會覺得我哋每個人都係個與世隔絕嘅孤島 然而大家其實都漂流緊係同一片大海

我哋係呢個宇宙嘅一部分正如一粒中子星係呢個宇宙嘅一部分

又正如係一個黑洞或者係一個星雲

其實可以話仲勁過佢哋 我哋係宇宙嘅感知部分

我哋係宇宙嘅核心器官

我哋真真正正係自由咁生活係一個名為宇宙嘅遊樂場

所以我哋不如嘗試去過得開心啲 去係星系之間建立一個美好嘅烏托邦啦

呢個世界仲有好多未知之謎等住我哋去解開

我哋仲唔明點解宇宙係宇宙宜家咁樣

我哋仲未知生命係點開始存在嘅 亦都唔知生命本身究竟係乜

我哋到宜家都搞唔明「意識」係乜鬼嘢 到宜家都唔知我哋係茫茫宇宙中係咪孤單嘅存在 （#i want to believe#）

但係我哋可以嘗試去尋求答案

宇宙入面有幾百萬嘅星球等住我哋去探索 有無數嘅病症等住我哋去醫治

有無數嘅人等住我哋伸出援手 有無數嘅快樂等住我哋去體驗

仲有無數嘅遊戲等住我哋打爆機添

你睇下 我哋仲有咁多嘢可以去做

咁都講咗咁多啦 你大概已經用咗你人生中嘅一大部分時間啦

假如呢一世人就係我哋得以用嚟生活嘅唯一一次機會 咁我哋冇理由唔玩盡佢

有幾開心就幾開心咁生活㗎

如果你可以令到其他人嘅人生更加美滿 當然就更加好啦

而如果你可以幫手起成個銀河人類帝國 咁就再好不過啦

用屬於你嘅有限嘅人生 去做啲你會令你感覺良好嘅嘢

你有得自己去決定呢家嘢對你嚟講嘅意義係乜

收工大家早抖 sorry for 1999